Միջնադարյան բերդաքաղաք և ամրոց Ամբերդը կառուցվել է պատմական Արագածոտն գավառում, Բյուրական գյուղից 7 կմ հյուսիս, Արագած լեռան հարավային լանջին, եռանկյունաձև հրվանդանի վրա: Գտնվում է ծովի մակարդակից 2300 մ բարձրության վրա:

Ամբերդը 10-13-րդ դարերում պատկանել է Պահլավունի իշխաններին և եղել է ռազմապաշտպանական կարևոր հենակետերից մեկը: Ամբերդը կառուցվել է երեք կողմից խոր կիրճերով շրջապատված բարձունքում: Կառուցապատման վայրը պատահական չի ընտրվել. գրեթե բոլոր հայկական եկեղեցիները և ամրոցները կառուցվել են թշնամու համար դժվարամատչելի վայրերում, և լեռնային տարածքի առանձնահատկությունները օգտագործվել են որպես բնական պաշտպանական հենակետեր:

Պահպանվել են Ամբերդի դղյակի և բերդապարիսպների ավերակները, եկեղեցին, բաղնիքը, ջրամատակարարման համակարգի և մի շարք այլ կառույցների մնացորդները:

Ամբերդի եկեղեցին կառուցել է Վահրամ Պահլավունին, 1026 թվականին, այն ունի դրսից ուղղանկյուն, ներսից խաչաձև հատակագծով կենտրոնագմբեթ կառուցվածք: