Տեղավորում Հայաստանում

Ջերմուկ

Share |

Վայրը` Վայոց ձորի մարզ
Հեռավորությունը Երևանից` 175 կմ
Բնակչությունը` 4,600
Բարձրությունը ծովի մակերևույթից` 2080 մ

Վայոց ձորի հյուսիս-արևելքում, Արփա գետի վերին հոսանքում գտնվում է Հայաստանի ամենահայտնի հանգստավայրերից մեկը` Ջերմուկը: Այն բոլոր կողմերից շրջապատված է լեռնաշղթաներով և խիտ անտառներով` բազամազան վայրի մրգատու ծառերով` տանձենիներով, սալորենիներով և խնձորենիներով: Այստեղ կարող եք հանդիպել նաև անտառային կենդանիների` աղվեսի, նապաստակի, նույնիսկ` արջի:

Ջերմուկ բառը առաջացել է ջերմ բառից, որը նշանակում է տաք: Ջերմուկը հարուստ է ստորգետնյա հանքային քաղցրահամ ջրերով, որոնք իրենց ֆիզիկական և քիմիական բաղադրությամբ չեն զիջում Չեխիայի Կառլովի Վառի կամ Ռուսաստանի Ժելեզնովոդսկի աղբյուրներին և դասվում են ածխաթթվային, հիդրոկարբոնատային, քլորային և մագնեզիումային ջրերի շարքին:

Ստորգետնյա գեյզերային տաք ջրերով հարուստ Ջերմուկը օգտագործվում է խմելու ու լոգանք ընդունելու համար, ինչպես նաև ստամոքսի, աղիների, որովայնային, երիկամային և նյարդաբանական հիվանդությունների բուժման նպատակով:

Ջերմուկն առանձանում է նաև իր մեղմ կլիմայով: Ամռանն այստեղ զով ու պարզ եղանակ է, գարունն ու աշունը` առանց մառախուղների, ձմեռը` ձնառատ և անհողմ: Այս ամենը միախառնվելով մաքուր լեռնային օդին կդարձնի ձեր հանգիստը անչափ հաճելի: