Հայաստան : Սրբալույս Մյուռոնի օրհնություն

Հայաստան

Սրբալույս Մյուռոնի օրհնություն

Share |

Յոթ տարին մեկ անգամ աշնանը Սուրբ Էջմիածնի Մայր Տաճարում մատուցվում է պատարագ և Ամենայն հայոց կաթողիկուսի ձեռամբ կատարվում է Սրբալույս Մյուռոնի օրհնություն, որը հայ ժողովրդի համար և առաքելական եկեղեցու կյանքի մեջ ամենանվիրական և ամենախորհրդավոր արարողություններից մեկն է: Սրբալույս Մյուռոնը խորհրդանշում է Աստծո ներկայությունը:

Դրանից քառասուն օր առաջ Վեհափառ Հայրապետը թափորով առաջնորդվում է Մայր Տաճար, ուր մաքուր ձիթայուղով լի Մյուռոնի կաթսայի առաջ Նորին սրբության շուրթերից հնչում է առաջին աղոթքը եւ կարդացվում Սուրբ Ավետարանը: Այդ օրվանից սկսվում է Մյուռոնի պատրաստման քառասունօրյա ծիսակատարությունը, որն ուղեկցվում է ամենօրյա աղոթքներով:

Հին կտակարանում նկարագրված սուրբ օծության յուղը ներկայիս Մյուռոնի նախատիպն է: Աստված է Մովսես մարգարեին հայտնել Մյուռոնի բաղադրության, պատրաստման և կիրառման մասին:

«Տերը խոսեց Մովսեսի հետ ու ասաց. «Վերցրու անուշահոտ համեմունքներ. դրանցից կպատրաստես սուրբ օծության համար յուղ: Դրանով կօծես վկայության խորանը, վկայության տապանակը, զոհասեղանն ու նրա ամբողջ սպասքը, ավազանն ու նրա պատվանդանը: Կսրբագործես դրանք, և դրանք կլինեն սրբությունների սրբություն: Ամեն ոք, որ դիպչի դրան, կմաքրվի»:

Հայ իրականության մեջ Մյուռոնի վերաբերյալ առկա են մի շարք ավանդություններ, որոնցից մեկի համաձայն, Հիսուսի ձեռքով օրհված ձիթապտուղը Թադևոս առաքյալը բերել էր Հայաստան:

Մյուռոնօրհնեքի ընթացքում հին մյուռոնը` օրհնված դեռ Գրիգոր Լուսավորչի ձեռքով, խառնվում է նորի հետ` սրբալույս շնորհը փոխանցելու նպատակով: Հայ եկեղեցին Մյուռոնօրհնության ծեսը կատարում է 7 տարին մեկ անգամ:

Կանոնի համաձայն, Մյուռոնօրհնությունից 40 օր առաջ ձիթենու յուղով լեցուն կաթսան դրվում է Մայր Տաճարի Ավագ սեղանի վրա: Հատուկ ծիսակարգով հոգևորական դասը թափորով տանում է Սուրբ Էջմիածնի սրբությունները: Կաթողիկոսը Մյուռոնաբույր կաթսայի մեջ է լցնում ավելի քան քառասուն բուսական ծագում ունեցող նյութեր, ծաղիկներ, ինչպես նաև կտավատի ձեթ և գինի, խաչակնքում է սուրբ Մյուռոնը, ապա կաթսան փակվում է կափարիչով, երկու օր շարունակ եռացնում թույլ կրակի վրա, հետո զանգվածը քամում մաքուր կտավներով և պահում մինչև Մյուռոնօրհնության օրը: Այս ամենը կատարվում է խորհրդավոր արարողությամբ, բարեպաշտական երկյուղածության մթնոլորտում:

Սրբալույս Մյուռոնի օրհնությունը կատարվում է բացառաբար Մայր Աթոռ Սուրբ Էջմիածնում, որտեղից տարված Մյուռոնով օծվում են բոլոր եկեղեցիները, սրբապատկերները, դրանով կատարվում են մկրտություններ, ինչպես նաև նորընտիր կաթողիկոսներն են օծվում մյուռոնով:

Մյուռոնը մաքրազերծում է հավատացյալների հոգին և երիտասարդացնում նրանց: Եթե մի պահ ցանկանում եք կանգնեցնել ժամանակը, ապա ծխեցրեք մյուռոնը և օծվեք նրանով: