Հայաստան : Հավերժ Հայաստան

Հայաստան

Հավերժ Հայաստան

Share |

Ճիշտ է, այս կայքը ներկայացնում է արդի անկախ Հայաստանը, սակայն հնարավոր չէ հիշատակել Հայաստանը միայն որպես այժմ գոյություն ունեցող սահմաններով երկիր ու ոչինչ չասել Արևմտյան Հայաստանի մասին, որը հայ ազգի մշակութային հարուստ օրրանն է, որտեղ հայ ժողովուրդը ապրել, կերտել, ծաղկել ու բարգավաճել է ավելի քան 4000 տարի:

Մարդկության պատմությունը շատ կորուստներ է արձանագրել և շատ ավելի` անարդարություններ: Կասկածից վեր է, որ այդ շարքում ամենամեծ կորուստներից ու անարդարություններից մեկը հինավուրց քաղաքակրթության կործանումն էր, որը ծաղկել և բարգավաճել է Հայաստանի արևմտյան մասում շուրջ 4000 տարի, և որն այժմ անվանում են Արևելյան Թուրքիա:

1915թ. թուրքական կառավարությունը կազմակերպեց և հետևողականորեն իրականացրեց 20-րդ դարի առաջին ցեղասպանությունը` ոչնչացնելով 1,5 միլիոն հայ: Դա մի ոճրագործություն էր, որն ուղղված էր ոչ միայն հայ ազգի, այլ նաև ողջ մարդկության դեմ: Մի քանի տարիների ընթացքում 1,5 միլիոն անմեղ հայեր դաժանաբար սպանվեցին և տեղահանվեցին: Հայերի բնօրրանում` Արևմտյան Հայաստանում, փոխվեց տարածքների ժողովրդագրական կազմը:

Այս բաժնում ներկայացվում է Արևմտյան Հայաստանը` վերջերս այնտեղ այցելած մարդու աչքերով: Նկարների այս անձնական ալբոմը նվիրաբերվել է կայքին: Այն նկարագրում է հայոց հարուստ մշակույթը Արևմտյան Հայաստանի տարածքում (այժմ` Արևելյան Թուրքիա), որը վերջին 90 տարիների ընթացքում իրար հաջորդող թուրքական կառավարությունների հովանավորությամբ հետևողականորեն ոչնչացվում է:

Այս էջը նպատակ ունի բացահայտել պատմական փաստերը, հայ և թուրք ժողովուրդների միջև խրախուսել երկխոսությունը և նորմալ հարաբերությունների հաստատումը` հանուն ճշմարտության, պատմական անարդարության ճանաչման և ուշացած խոստովանության: Միայն այդ դեպքում հնարավոր կլինի ակնկալել երկու ժողովուրդների միջև երկարատև ու խաղաղ համագործակցություն: Հայոց Ցեղասպանության մասին կարդալու համար սեղմեք այստեղ: