Հայաստանի տեսարժան վայրերը

Սարյանի տուն-թանգարան

Share |

Հայ մեծագույն նկարիչ Մարտիրոս Սարյանը ծնվել է 1888թ.: Ավարտել է Մոսկվայի գեղանկարչության, քանդակագործության և ճարտարապետության ուսումնարանը, ուսանել է մեծ վարպետներ Վ. Սերովին և Կ. Կորովինին: Իր երկար ու խոչնդոտներով լի ճանապարհին միակ ուղենիշն ու հենակետը եղել է Հայաստանն իր անկրկնելի բնապատկերներով ու ժողովրդի կենցաղն իր յուրահատուկ կոլորիտով:

Սարյանը նվիրված էր Հայաստանին ու իր ժողովրդին: Էջմիածնում նա օգնել է եղեռնից փրկվածներին, Թիֆլիսում հիմնադրել է հայ նկարիչների Միություն, ստեղծել է Խորհրդային Հայաստանի զինանշանը և հայկական առաջին պետական թատրոնի բեմական վարագույրը: Եղել է Հայաստանի ազգային պատկերասրահի առաջին տնօրենը: Այդ տաղանդաշատ նկարիչն իր արվեստի ու կտավների միջոցով միլիոնավոր մարդկանց փոխանցել է Հայաստանի վառ գույները:
Մարտիրոս Սարյանը վախճանվել է 1972թ.` թողնելով ստեղծագործական մեծ ժառանգություն:

Սարյանի տուն-թանգարանը բացվել է 1967թ.` նրա կենդանության օրոք, Հայաստանի կառավարության նախաձեռնությամբ: Տուն-թանգարանի տնօրենը նկարչի թոռնուհին է: Սկզբում ցուցանմուշների հիմնական մասը բաղկացած էր 50 գործերից, որոնք թանգարանին նվիրաբերել էր անձամբ Սարյանը: Հետագայում հավաքածուն համալրվեց նկարչի տարբեր ժամանակների աշխատանքներով: Տունը պահպանվել է այնպես, ինչպես Սարյանի կենդանության օրոք էր: Այցելուները նրա արհեստանոցում կարող են տեսնել բազմաթիվ նկարներ, անավարտ էսքիզներ, վրձիններ, անձնական իրեր, լսել պատմություններ այդ արտասովոր ու հանճարեղ մարդու մասին: