Հայաստանի տեսարժան վայրերը

Խոր Վիրապ

Share |

Հայ Առաքելական եկեղեցու սրբավայր և ուխտատեղի Խոր Վիրապը գտնվում է Թուրքիայի սահմանից ոչ հեռու, բլուրի վրա, նրա պատմությունը կապված է քրիստոնեության տարածման հետ:

Ըստ եկեղեցական ավանդության` այս վայրում եղել է թագավորական զնդան` լցված թունավոր օձերով ու միջատներով, ուր նետում էին բանտարկյալներին: Հենց այս խորշում Տրդատ 3-րդ արքայի հրամանով 13 տարի բանտարկված է եղել Գրիգոր Լուսավորիչը` քրիստոնեությունը տարածելու համար:

Ավանդույթի համաձայն, երբ Տրդատ արքայի հրամանով նահատակվում են երեք կույսերը` Գայանեն, Հռիփսիմեն ու Շողակաթը, նա ծանր հիվանդանում է: Բազմաթիվ միջոցներ են գործադրվում, բայց արքան չի ապաքինվում: Թագավորի քույր Խոսրովիդուխտը երազ է տեսնում, որ արքային կարող է բուժել միայն Խոր Վիրապում բանտարկված Գրիգորը և պնդում է ազատել նրան: Ազատվելով բանտից` Գրիգորը բուժում է Տրդատին: Թագավորը և Գրիգորը կույսերի նահատակության վայրում կառուցում են վկայարաններ ու ամփոփում նրանց մասունքները:

Տրդատ արքան դադարեցնում է քրիստոնյաների հալածանքը, հռչակում քրիստոնեությունը պետական կրոն, իսկ Գրիգորը դառնում է առաջին կաթողիկոսը` Գրիգոր Լուսավորիչ անվամբ: 624թ. Ներսես 3-րդ կաթողիկոսը զնդանի տեղում կառուցում է ժամատուն, որը հետագայում ավերվում է. նրա տեղում 1662թ. կառուցվում է ներկա Սբ. Աստվածածին եկեղեցին:

Խոր Վիրապից հիանալի տեսարան է բացվում դեպի բիբլիական Արարատը: