Հայաստանի տեսարժան վայրերը

Իջևան

Share |

Իջևան քաղաքը Տավուշի մարզի վարչական կենտրոնն է: Քաղաքը գտնվում է Երևանից 142 կմ հյուսիս, փռված է Աղստևի գետի երկու ափերին, Իջևանյան լեռնաշղթայի ստորոտին: Քաղաքը շրջապատված է լեռներով, որոնք պատված են սաղարթախիտ անտառներով, որոնց տեղ-տեղ փոխարինում են ալպիական մարգագետինները: Կլիման մեղմ է ու տաք, ցուրտ օրեր հազվադեպ են լինում: Ձյուն տեղում է ամեն տարի, սակայն անմիջապես հալվում է: Օդի միջին ջերմաստիճանը օգոստոսին կազմում է մոտ 23˚С, հւոնվարին` 0˚С–ին մոտ, տեղումները քանակությունը` տարեկան 563 մմ:

Քաղաքի պարծանքն է Բուսաբանական այգին, ուր կան մեծ քանակությամբ յուրահատուկ բույսեր: 1985-ից 1990 թվականները Իջևանում տեղի էր ունենում քանդակագործների ամենամյա միջազգային սիմպոզիում: Քաղաքի կենտրոնում գտնվում է կենտրոնական զբոսայգին, ուր տեղադրված են սիմպոզիումին մասնակցած տարբեր երկրների քանդակագործների ստեղծագործությունները: Այստեղ կարելի է զբոսնել պուրակում, հիանալ հետաքրքիր քանդակներով ու հանգստանալ:

Իջևանի լեռները ամբոջովին պատված են փարթամ անտառներով: Հենց այս տարածքում է գտնվում Հայաստանի անտառների 60 տոկոսը, որտեղ աճում են կաղնի, հացենի, վայրի կեռասենի, նռնենի, հաճարենի և այլն: Իսկ վայրի մրգատու ծառերից աճում են տանձենի, սալորենի, հոնենի և բազմաթիվ հատապուղներ: Անտառներում կենդանական աշխարհը շատ բազմազան է: Կան արջեր, նապաստակներ, գայլեր, վարազ, լուսան և այլն: Հաճախ կարելի է տեսնել երկնքում սավառնող արծիվների ու բազեների թռիչքը:

Իջևանը համարվում է հանրապետության հյուսիս-արևելյան դարպասը: Խորհրդային տարիներին քաղաքի միջով էր անցնում Երևան-Թբիլիսի ավտոճանապարհը: Ժամանակակից Իջևանի շրջակայքով էին անցնում քարավանները, որոնք կանգ էին առնում իջևանատնում: Հետազոտությունները ցույց են տվել, որ իջևանատունը գտնվել է ժամանակակից քաղաքից 10 կմ հարավ, Աղստև գետի ձախ ափին, ուր մինչ այժմ պահպանվել են հին բաղնիքի փլատակները:

Իջևանը վաղուց հայտնի է իր գորգագործներով, որոնց աշխատանքները առանձնանում են իրենց հյութեղ գույներով և նկարների հստակությամբ: Հայաստանի պատմության թանգարանում ցուցադրված են իջևանյան հին գորգերի նմուշներ:

Քաղաքի մուտքի մոտ գտնվում է Իջևանի գինու գործարանը, որը հայտնի է իր գինիների անկրկնելի համով: Գործարանում կարելի է կազմակերպել այցելություններ, դիտել գինու արտադրման պրոցեսը, համտեսել գինիներից, գնել գինիներ անմիջապես գործարանի խանութում:

Իջևանի տարածաշրջանի ամենահաճախելի վայրը համարվում է Մակարավանքը: Տարածաշրջանում կան շատ քարանձավներ, ջրվեժներ: Այն շատ գրավիչ է նաև ակտիվ հանգստի սիրահարների համար. այստեղ կարելի է կազմակերպել ձիարշավներ, հետիոտնային, հեծանվային արշավներ և այլն:
Իջևան