Հայաստանի տեսարժան վայրերը

Ժողովրդական արվեստի թանգարան

Share |

Հովհաննես Շարամբեյանի անվան ժողովրդական արվեստի թանգարանը մշակույթի եզակի կենտրոն է, որտեղ պահպանվում և ցուցադրվում են հայկական դեկորատիվ-կիրառական արվեստի և կերպարվեստի նմուշներ: 1930-ականների վերջին ազգագրագետ-բանահավաք Հաբեթնակ Բաբայանի գլխավորած մի խումբ նվիրյալների ջանքերով հիմնադրվում է Ժողովրդական ստեղծագործության տունը, որի հավաքածուն հիմք է հանդիսանում թանգարանի կազմավորման համար:

Հայաստանի ժողովրդական արվեստի թանգարանը ստեղծվել է 1978թ. Հայաստանի մշակույթի նախարարության կողմից, հիմնադիր և առաջին տնօրեն` ՀՍՍՀ արվեստի վաստակավոր գործիչ Հովհաննես Շարամբեյան:

Թանգարանի ցուցանմուշները ազգային մշակույթի արժեքներ են, որոնք լայն պատկերացում են տալիս հայկական ժողովրդական արվեստի զարգացման տարբեր փուլերի մասին: Հավաքածուն ընդգրկում է փայտի, քարի փորագրության, մետաղի գեղարվեստական մշակման, խեցեգործության, ասեղնագործության նմուշներ, գորգեր, կարպետներ, մանրաքանդակներ, գեղանկարչական աշխատանքներ: Առանձնակի տեղ են գրավում սփյուռքահայերի նվիրատվությունները:

Ինչպես դարեր առաջ, այսօր էլ հայ վարպետների աշխատանքները ներկայացնում են բարձր գեղարվեստական ճաշակի և վառ երևակայության օրինակներ: Այժմ էլ հայ վարպետը արարում է` ստեղծելով հրաշալի գործեր, որոնք վկայում են դարերի խորքից եկող ճշմարիտ արվեստի հարաատև ուժը:

Թանգարանի նմուշները ցուցադրվել են Ֆրանսիայի, Բելգիայի, Իտալիայի, Պորտուգալիայի, Հունաստանի և այլ երկրների ցուցահանդեսներում: