Հայաստանի տեսարժան վայրերը

Արագած լեռ և Քարի լիճ

Share |

Հայկական լեռնաշխարհի հյուսիս-արևելյան մասում, Արարատյան և Շիրակի դաշտերի սահմանագծին, իր շրջակայքից առանձնանում և վեր է հառնում քառագագաթ Արագածը: Նրա հյուսիսային գագաթի բարձրությունը 4090 մ է, արևմտյան գագաթինը` 4080 մ, արևելյան գագաթինը` 3916 մ և հարավային գագաթի բարձրությունը` 3879 մ:

Պատմում են, որ մի գիշեր, երբ Գրիգոր Լուսավորիչը աղոթում է Արագած լեռան կատարին, նրան լուսավորում է երկնքից կախված մի մշտավառ կանթեղ: Ժողովուրդը մի հիասքանչ ավանդազրույց է հյուսել նրա շուրջ և այդ «կանթեղը»
համարել հայոց հույսի, հայ մարդու երազանքի խորհրդանիշ` «Լուսավորչի կանթեղը»: Ասում են, թե այդ կանթեղը այժմ էլ կա և տեսանելի է միայն արժանավոր մահկանացուներին:

Արագածի լանջերից բխում են հազարավոր սառնորակ աղբյուրներ, սառցադաշտային կրկեսում ծփում են լեռնային սառնորակ լճեր, որոնցից է Քարի լիճը: Այն գտնվում է ծովի մակարդակից 3250 մետր բարձրության վրա:

Բյուրականից ասֆալտապատ ճանապարհը տանում է մինչև Արագածի հյուսիս-արևմտյան նախագագաթ և ավարտվում Քարի լճի մոտ, որտեղից սկիզբ է առնում Արկաշեն գետը: Քարի լճի արևելյան ափին է գտնվում օդերևութաբանական կայանը: