Հայաստանի տեսարժան վայրերը

Ազատության հրապարակ

Share |

Օպերայի և բալետի պետական ակադեմիական թատրոնի վեհաշուք շենքի դիմաց գտնվում է Ազատության հրապարակը:

Երբ 1988 թվականին սկսվեց Ղարաբաղյան շարժումը, այս հրապարակում էին հավաքվում միլիոնավոր մարդիկ` որոշելու Հայաստանի հետագա ճակատագիրը ու պայքարելու երկրի անկախության համար: Հայաստանի լավագույն զավակներն այս հրապարակում Հայրենիքին հավատարմության երդում էին տալիս ու գնում պատերազմ` հայրենիքն ու Արցախի (Ղարաբաղի) հայությանը պաշտպանելու համար:

Պատմականորեն այս վայրը ուխտավայր ու սրբավայր է եղել հայերի համար: Մինչև 1920 թվականը Օպերայի ու բալետի թատրոնի շենքի տեղում եղել է զբոսայգի ու Գեթսեմենի եկեղեցին` Երևանի ուխտագնացության ամենահնագույն վայրը: 80 տարի անց եկեղեցին փոխարինվեց Երևանի Օպերայի և բալետի թատրոնի շենքով: Եվ հիմա, երբ Հայաստանը նորից վերականգնել է իր անկախությունը, մարդիկ շարունակում են իրենց սերն ու հարգանքը արտահայտել Ազատության հրապարակի հանդեպ:
Ազատության հրապարակը զարդարում են հայ մեծ բանաստեղծ Հովհաննես Թումանյանի և նշանավոր երգահան Ալեքսանդր Սպենդիարյանի արձանները:

Ազատության հրապարակը ժամանցի լավագույն վայրերից է, ուր կարելի է պարզապես հանգստանալ, հանդիպել հեծանիվներով ու անվավոր չմուշկներով պտտվող երեխաներին, համտեսել հայկական գարեջուր ու պաղպաղակ…